Besuch der Kiwis und der Burmanen

Coromandel

Das Wucheändi si mir mit zwöi Schueukollege, em Fabian vom grosse Kanton und dr Yumi us Japan, ungerwägs gsi. D Region um Coromandel isch berüehmt für schöni Buchte und Sandstränd. Eini vo de gröschte Attraktione isch dr Hotwater-Beach, wo me im Sang cha es Loch buddle und das föut sich de mit heissem Wasser. Das hei mir natürlich müesse usprobiere. Nach ca. 30 min puddle zwüsche hundert angere Lüüt hei mir de ändlich es Plätzli mit heissem Wasser gfunge, aber das isch de so heiss gsi, dass mir nidemou mit de Füess hei chönne dristo... Drum hei mir öis de schlussändlich eifach für nes Bad im Meer entschide Am Sunnti si mir i eire vo dene Buchte go schnorchle und hei näbscht idrückleche Fisch au no e Tintefisch und sogar e Roche chönnne beobachte.
Jetz si mir scho ir letzte Schueuwuche aglangt und när göutets Ärnscht mit de Prüefige und NÄR HEI MIR DE ÄNDLICH FERIE und de geits ab uf d Südinsle!!!!!!